एखादी फाईल दुसऱ्याला पाठवताना कायम विचार करावा लागतो की त्याकडे संबंधित सॉफ्टवेअर असेल ना, त्याचे व्हर्जन अपडेटेड असेल ना, त्याकडे आपण वापरलेलेच फॉंट्स असतील ना वगैरे. काही वेळा एखादी फाईल तयार करण्यास वेळ लागत नाही, पण ती ज्याला पाठवली आहे त्याला दिसण्यास जास्त वेळ लागतो. यावर उत्तम पर्याय म्हणजे पीडीएफ फाईल पाठवणे. पीडीएफ रीडर शक्यतो सगळ्यांकडे असतो. त्यामुळे पीडीएफ फाईल दिसण्यात काही अडचण येत नाही. पीडीएफ रीडर असला तरी अॅक्रोबॅट प्रोफेशनल नसल्यामुळे इतर फॉरमॅटमधील डॉक्युमेंट्स पीडीएफमध्ये कन्व्हर्ट करण्यात अडचणी येतात. यावरचा सोपा मार्ग म्हणजे व्हचर्चुअल पीडीएफ प्रिंटर ड्रायव्हर वापरणे. तो कसा वापरायचा हे मी या पोस्टमध्ये समजावून सांगणार आहे.

डॉक्युमेंट्स, क्रिएटिव्ह मटेरियल्स, फोटोग्राफ्स वगैरे एक्स्चेंज करण्यासाठी सहसा पीडीएफ - पोर्टेबल डॉक्युमेंट फॉरमॅट वापरला जातो. अनेकवेळा आहे त्या फॉरमॅटला पीडीएफमध्ये कन्व्हर्ट करण्यासाठी खूप प्रोसेसेस कराव्या लागतात. एखादी प्रोफेशनल व्यक्ती ज्या सफाईदारपणे हे काम करू शकते तेवढेच ते सर्वसाधारण व्यक्तीसाठी कठीण जाते. अशा लोकांसाठी क्युटपीडीएफ किंवा डूपीडीएफ ही व्हचर्चुअल पीडीएफ प्रिंटर ड्रायव्हर्स उपलब्ध आहेत. इन्स्टॉल केल्यानंतर केवळ एका क्लिकवर तुम्ही कोणतेही डॉक्युमेंट पीडीएफमध्ये कन्व्हर्ट करू शकाल.
उदा. तुम्ही मायक्रोसॉफ्ट वर्ड वापरून १० पानी रिपोर्ट तयार केला आहे. तो पीडीएफमध्ये कन्व्हर्ट करण्यासाठी केवळ प्रिंट कमांड (Control + P) द्या. एरवी येणाऱ्या प्रिंट अॉप्शनसह सेव्ह अॅज पीडीएफ अशा आशयाचे एक बटन तुम्हाला दिसेल. त्यावर क्लिक करून तुम्ही संबंधित डॉक्युमेंट पोर्टेबल डॉक्युमेंट फॉरमॅटमध्ये (पीडीएफ) सेव्ह करू शकता.

क्युट पीडीएफ डाऊनलोड करण्यासाठी येथे क्लिक करा. (क्युटपीडीएफ रन करण्यासाठी लागणारी PS2PDF घोस्टस्क्रिप्ट येथून डाऊनलोड करा)
डू पीडीएफ डाऊनलोड करण्यासाठी येथे क्लिक करा.

हे दोन्ही व्हचर्चुअल पीडीएफ प्रिंटर ड्रायव्हर विंडोज ९८, ME, २०००, २००३, एक्सपी आणि व्हिस्टाला (३२ आणि ६४-बिट) सपोर्ट करतात.